बासी खाना र चर्को मूल्य असुल्ने होटलमाथि निगरानी बढाइँदै

काठमाडौं, २८ असोज । सार्वजनिक यात्रुवाहक सवारीसाधनमा यात्रा गर्ने यात्रुलाई बासी, अस्वच्छ तथा न्यून गुणस्तरको खाना खुवाउने र चर्को मूल्य असुल्ने होटल तथा रेस्टुरेन्टमाथि कारबाही हुने भएको छ ।

यात्रुबाट सरसफाइको कमी, झिँगा भन्केका खाना तथा अत्यधिक मूल्य लिएको गुनासो आएपछि पूर्वाधार विकास मन्त्रालयमा सम्बन्धित निकायबीच छलफल गरी यस्तो निर्देशन जारी गरिएको हो ।

निर्देशनअनुसार सवारी चालकले सम्भव भएसम्म खाद्य प्रविधि तथा गुण नियन्त्रण विभागको खाद्य स्वच्छतासम्बन्धी स्टिकर टाँसिएका होटल तथा रेस्टुरेन्टमा यात्रुलाई खाजा, नास्ता र खाना खुवाउन सवारी रोक्नुपर्नेछ ।

खाना खाएकै कारण यात्रु बिरामी भएमा सम्बन्धित सवारी चालक र होटल सञ्चालकलाई प्रचलित कानुनबमोजिम कडा कारबाही गरिने सूचनामा उल्लेख छ ।

त्यस्तै, खाना तथा खाजाको गुणस्तरमा कमी वा मूल्यमा ठगी भएको पाइएमा यात्रुले नेपाल प्रहरीको हेल्पलाइन नम्बर १०० मा फोन गर्न सक्नेछन् । साथै, जिल्ला प्रशासन कार्यालय, जिल्ला प्रहरी कार्यालय, जिल्ला ट्राफिक प्रहरी कार्यालय वा खाद्य प्रविधि तथा गुण नियन्त्रण विभागमा समेत उजुरी गर्न सकिने जनाइएको छ ।